Si Rojak Kabur, Firsa Nelangsa

“Bang Dudung, lihat si Rojak gak? Udeh 2 bulanan eni gak kelihatan batang hidungnye….,” tanya Mamat ke Dudung sambil nuang kopinye ke piring kecil.

“Gue denger katenye die umroh… bener kagak tuh? Masa’ umroh sampe 2 bulan gini… ape die sekalian mo puase di Arab sonoh? Emang banyak duit ape die? Perasaan die gak pernah kerja. Cuma keliatannye aje sibuk sana sini. Tau deh kerjanye apaan….” jawab Dudung panjang lebar.

“Nah entu die…., jadi gini Bang… kemarin ane ketemu Firsa, pacarnye si Rojak. Die keliatan stress banget, Bang. Pas curhat, eh die nangis… dia bilang die lagi hamil, Bang….”

“Innalilahi….”

“Kesian kan si Firsa, die pikir bakal dinikahin sama si Rojak. Die bilang si Rojak janji die mau umroh dulu, sepulangnye nanti, die bakal ngawinin Firsa. Eh… sampe sekarang tau-tau gak ade kabarnye,” cerita Mamat.

“Ya Allah… Rojak…. Rojak… lagaknye doang ye die rajin ke mesjid… ternyate kelakuannya gak bertanggung jawab,” ujar Dudung.

“Bang…, telornye setengah mateng aje,” Mamat yang sebelum ngobrol pesan mie goreng telor, ngingetin Dudung.

“Iye… nah elu juga Mat. Jangan sampe kayak si Rojak. Laki-laki nakal masih wajar, asal berani tanggung jawab. Utang lu nih udeh sejuta di warung gue, akhir bulan lunasin ye…,” oceh Dudung sambil meniriskan mie goreng.

“Iye…,” jawab Mamat yang langsung sruput kopinya.

*Srupuuut….

 

Erri Subakti

Erri Subakti

Analis sosial budaya, pegiat sosial media, penulis, saat ini sedang mempelajari digital marketing. Follow me @errisubakti ( https://twitter.com/errisubakti )